شعر:
صاحبة السمو الملكي الأميرة:
مضاوي بنت المنتصر بن سعود بن عبدالعزيز آل سعود
يا وطنا رفرف العز يلمع في سماك
قمة الأمجاد دار السعود احتلها
تهتدي بملوكك الغر والمولى هداك
وادركت يمناك روس الفضايل كلها
ارتديت المجد يا دار والمجد ارتداك
وأنت عنوانٍ للأمجاد وأنته خِلّها
عشت يا سلمان سقم العدا سلمت يداك
العدا من قو باسك تموت بغلها
ما تجي معشار عزمك ولا تبلغ مداك
صيرميٍ كل صعب الأمور تحلها
ولا لنيران الحرايب ليا شبّت سواك
الكبود تعلها واليدين تشلها
وأنت عزٍ للعروبه وعز اللي نخاك
ونخْوتك يا سيد العرْب جت في حلها
عاصفة حزمك وعزمك على الحوثي هلاك
خل من يتبع رداهم يعيش بذلها
وخل منهو خان بارضه يعرف دهاك
وهو منوّل في نعيم الخليج وظلها
يا وطنا نبذل الروح والغالي فداك
تمتثل لرضاك دق الأمور وجلها
فعلنا نارٍ تلظى على هامة عداك
نسقي العدوان سم البلا ونعلها
والله إني بنت وأفزع إذا جاني نداك
إنت شجرة عز وأنا ربيت بظلها
تبذل الغالي لعينك وتدفن في ثراك
من لها يا موطن العز غيرك من لها