هنا الدوله ترفرف في سماها راية التوحيد
بعد عبدالعزيز اللّي حماها واعلن الدوله
تعالت للسما واسترسل التكبير والتمجيد
تدانت كل نجمه كنّها للأرض مرسوله
تقول إن السعوديه علت عن قاع وبيد
رفعها الله بالدين الحنيف وحكمة زحوله
ما هي بيّة بلد هذي الطهاره في صباح العيد
بعد راح الجهل ووجيهنا بالطهر مغسوله
وش الجغرافيا وشهي مساحتها وش التحديد؟
هذي أرقام ندرسها فقط ما هي بمقبوله
مساحتها القلوب اللّي روت بالدم رمل وحيد
الين أنبت نباتٍ يشبع التاريخ محصوله
فروعك للسما والأصل ثابت وانتي التجديد
كذا ما عاد لحدود الخرايط شي بتقوله
تحرر كل حدٍ في القلوب بدون شرط وقيد
سكنتي في السماء حتى القمر ما بان لك زوله
يهز البرق جذعك في السماء وانتي بلا ترديد
تساقط منك ما يكفي البلاد بعرضه وطوله
ترى الشعب السعودي ما يهمه يوم بالتحديد
يبين فرحته واللي يريد يقوله يقوله
ترى في كل يوم نعيش فرحتنا نهار العيد
ويتجدد ولانا للملك والدين والدوله